Киік етінен 5 тоннадан астам консерв алынды

АСТАНА. KAZINFORM – Ауыл шаруашылығы министрлігі Kazinform сауалына жолдаған жауабында 2023 жылы киік етінен қанша консерв жасалғанын мәлім етті.

«2023 жылы киік етінен 5 425 килограмм консерв өндірілді. Киік етінің консервісі Қостанай облысында (Қостанай және Арқалық қалаларында), Астанда сатылды», - делінген жауапта.

Сондай-ақ, жауапта киік етін консервілеумен жалғыз кәсіпорын ғана («Торғай ет» ЖШС) айналысқаны айтылған. Бұл кәсіпорын киік етін консервілеуді 2023 жылдың желтоқсан айында тоқтатқан.

«Ет өңдеуші кәсіпорындар киік етін қайта өңдеуді мақсат етіп отырған жоқ. Өйткені олар негізінен ірі қара мен ұсақ малдың етін өңдеуге бағдарланған», - деп жазылған министрлік мәліметінде.