Қырғызстанда әскери қызметкерлердің жалақысы көтеріледі

АСТАНА. KAZINFORM — Қырғызстанда 1 шілдеден бастап күш құрылымдары офицерлерінің жалақысы көтеріледі, деп хабарлайды Kazinform тілшісі. 

Бұл туралы Қырғыз Республикасының Президенті Садыр Жапаров Ұлы Жеңістің 80 жылдығын мерекелеу құрметіне сөз сөйлеуі кезінде айтты.

Қырғызстан басшысының айтуынша, 1 шілдеден бастап күш құрылымдары офицерлерінің жалақысы орта есеппен 35%-ға артады, ал 1 қарашадан бастап келісімшарт бойынша қызмет атқарып жүрген әскери қызметшілердің жалақысы осыншама өседі. 

— Биылғы жылдың басынан әскери қызметкерлердің отбасылары қоғамда өздерін сенімді әрі абыройлы сезінуі үшін әскери қызметшілер мен құқық қорғау органдары қызметкерлерінің жалақысы, сондай-ақ уақытша тұрғын үйді жалға алғаны үшін ақшалай өтемақы мөлшері арттырылды. Ағымдағы жылдың 1 шілдесінен бастап күш құрылымдары қызметкерлерінің жалақысы орта есеппен 35 пайызға артады, ал 1 қарашадан бастап келісімшарт бойынша қызмет ететін әскери қызметшілердің жалақысы да осыншама мөлшерде өседі, — деді ол.

Бұған дейін Қырғызстанда арнайы инвестициялық аумақ құрылатынын жазған болатынбыз.