Қыста көлікті жылыту кезінде қандай қауіпсіздік ережелерін сақтау керек
АСТАНА. KAZINFORM – Күн суытқан кезде автокөліктерде өрт шығу қаупі артады. Осыған байланысты Төтенше жағдайлар министрлігі жүргізушілерге көлікті жылыту кезінде қауіпсіздік талаптарын қатаң сақтауды ескертті.
Министрлік мәліметінше, қыс мезгілінде жүргізушілер көліктерін жиі жылытады. Алайда электр сымдарының ақауы, жанармайдың ағуы немесе жылыту құрылғыларын дұрыс пайдаланбау өртке әкелуі мүмкін.
Сондықтан төтенше жағдайлардың алдын алу үшін көліктің техникалық жағдайын үнемі бақылап, қауіпсіздік ережелерін сақтау қажет.
– Электр сымдарының, аккумулятордың және жанармай жүйесінің жарамдылығын үнемі тексеріңіз. Қозғалтқышы қосулы тұрған көлікті қараусыз қалдырмаңыз. Көлікті жылыту үшін ашық отты және қолдан жасалған құрылғыларды пайдаланбаңыз. Тиісті желдету жүйесі жоқ жабық гаражда көлікті жылытпаңыз, – делінген министрлік хабарламасында.
Сонымен қатар ТЖМ мамандары жүргізушілерге көлікте жарамды өрт сөндіргіш ұстап, оны қолдану тәртібін алдын ала меңгеруге кеңес береді.
Қозғалтқыш бөлігінде жанғыш материалдардың жиналуына жол бермеу және автокөлікке уақытылы техникалық қызмет көрсету де маңызды.
Егер көліктен күйік иісі шығып, түтін немесе өрт белгілері байқалса, жүргізуші дереу көлікті тоқтатып, қозғалтқышты өшіруі керек. Одан кейін салоннан шығып, 101 немесе 112 нөміріне хабарласу қажет.
Ведомство өрт қауіпсіздігі ережелерін сақтау азаматтардың өмірі мен мүлкін қорғауға көмектесетінін еске салды.
Айта кетейік, бұған дейін Қазақстанда жыл басынан бері 373 автокөлік өртенгені хабарланған болатын. Мамандар өрттің негізгі себептері ретінде электр жүйесіндегі ақауларды, жанармай мен майдың ағуын және қозғалтқыш бөлшектерінің қызып кетуін атаған.