Қытайдағы электромобильдер сатылымы 11,5 млн данаға жетуі мүмкін
БЕЙЖІҢ. KAZINFORM – Бейжіңдегі Auto China 2024 18-ші халықаралық автосалонында 278 электромобиль моделі ұсынылды. Өткен жылы Қытайда электромобиль экспорты күрт өскен. Биыл елдегі жалпы көлік экспорты 5,5 млн данаға жетеді деп жоспарланып отыр.
Биыл Бейжің автосалонында 117 әлемдік премьера (оның ішінде 30-ы трансұлттық компаниялардың әлемдік тұсаукесері) және 41 концепт-кар моделі ұсынылды. Көрмеде сонымен қатар 278 электромобиль үлгісі таныстырылған.
Қытай автомобиль өнеркәсібі қауымдастығының (CAAM) мәліметінше, 2023 жылдың соңына қарай Қытай 4,91 млн көлік экспорттаған. Жаппай өсім өткен жылы 77,6%-ға өсіп, 1,2 млн бірліктен асқан жаңа энергетикалық көлік құралдары (NEVs) экспортының күрт өсуіне байланысты болды. Өткен жылмен салыстырғанда таза электр көліктерінің экспорты 80,9%-ға, гибридті көліктер экспорты – 47,8%-ға өсті.
Өткен жылы энергетикалық көліктердің өндірісі мен сатылымы сәйкесінше 9,58 млн және 9,49 млн данадан асып, жылдық есептеу бойынша 35,8 пайызға және 37,9 пайызға өсті. NEV нарығының үлесі 31,6% болды.
CAAM мәліметінше, 2023 жылы Қытайда автомобиль өндіру және сату көлемі 30,16 млн (+11,6%) және 30,09 млн (+12%) бірлік болған. Болжамға сәйкес, Қытайда NEV сатылымы 2024 жылы 11,5 млн данаға, ал жалпы көлік экспорты 5,5 млн данаға жетеді.
Бейжің көлік салоны Shunyi халықаралық көрме залында 4 мамырға дейін жұмыс істейді. 25-26 сәуір күндері Auto China 2024 тек қытайлық және шетелдік журналистер үшін жұмыс істейді. Осы екі күн ішінде БАҚ өкілдері үшін рекордтық көрсеткіш – 163 баспасөз конференциясы өтеді.
