Қыздар міндетті әскери қызметке шақырыла ма
АСТАНА. KAZINFORM — Мәжіліс кулуарында ҚР Қорғаныс министрінің тәрбие және идеологиялық жұмыстар жөніндегі орынбасары Асқар Мұстабеков әйелдерді әскерге алу туралы журналистер сұрағына жауап берді.
Алдымен ол қазір қыздардың өз еркімен әскерге баруы жөнінде пікір білдірді.
— Ұсыныстар бар. Қыздар тіркеліп жатыр, — деді Асқар Мұстабеков.
Журналистер «Геосаяси жағдай ушыққан жағдайда Израильдегідей қыз-келіншектерге де міндетті әскери қызметке шақыру жіберіле ме?» — деп сұрады.
— Бізде ондай жоқ, жоспарда да жоқ, — деп жауап берді Қорғаныс министрінің орынбасары.
Айта кетейік, бұған дейін Қорғаныс министрлігі әскерде намаз оқуға қатысты мәлімдеме жасағанын жазғанбыз.
