Қызылорда әкімдігі бұрын жөнделген көшеге 1,2 млрд теңгеге конкурс жариялаған

ҚЫЗЫЛОРДА. KAZINFORM – Қызылорда қаласының прокуратурасы бюджет қаражатының мақсатты жұмсалуына жүргізілген талдау нәтижесінде 2,8 млрд теңгеге құқық бұзушылық анықтады.

— Қала әкімдігі 1,4 млрд теңгеге қала көшелерін жөндеуге жарияланған конкурста бұрын жөндеу жұмыстары жүргізілген көшені енгізген. Осы тектес, жұмыстар орны мен көлемі нақты көрсетілмеген жобалау-сметалық құжаттама негізінде көшелерді күрделі жөндеуге 1,2 млрд теңгеге, сондай-ақ қала көшелерін жыл көлемінде санитарлық тазалау жұмыстары шартқа сәйкес жүзеге асырылып жатқанына қарамастан, қосымша тазалау жұмыстары үшін 223,2 млн теңгеге негізсіз мемлекеттік сатып алу конкурстары жарияланған, - делінген хабарламада.

Енгізілген қадағалау актісінің қаралу нәтижесімен 2,8 млрд теңгеге 3 конкурстың күші жойылып, бюджет қаражатының негізсіз жұмсалуына жол берілмеді.

Аталған бағытта жұмыстар жалғасып жатыр. 

Бұған дейін хабарланғандай, Қызылорда облысында 2,3 млн текше метрден астам суды заңсыз пайдалану фактілері анықталған еді.