Қызылорда облысында 84 экологиялық заңнама талабын бұзу дерегі анықталды

ҚЫЗЫЛОРДА. KAZINFORM - Қызылорда облысы бойынша экология департаменті 2024 жылы қоршаған ортаны қорғау саласында 57 нысанға бақылау шарасын ұйымдастырды. 

Оның ішінде 19-ы профилактикалық бақылау және қадағалау болса, 37 жоспардан тыс және 1 талаптарға сәйкестік тұрғысынан тексеру болып отыр.

Бақылау шарасының нәтижесімен 84 экологиялық заңнама талабын бұзу дерегі анықталған. Аталған кемшіліктерді жою үшін 82 нұсқама берілген.

- 2024 жылға бекітілген кестеге сәйкес 69 субъектіге профилактикалық бақылау шаралары жүргізілді. Ол бойынша анықталған заңбұзушылықтарды жою жөнінде ақпараттық хаттар жолданды. Аталған заң бұзушылықтар толығымен жойылды. Департаменттің мемлекеттік экологиялық бақылау қызметі «Байқоңыр» кешеніндегі объектілерді де қамтиды. Департамент мамандары былтыр 12 нысанға жоспарлы тексеріс жұмыстары жүргізді. Анықталған 9 заң бұзушылықты жою жөнінде ұйғарымдар беріліп, толығымен орындалды, - деді Қызылорда облысы бойынша экология департаменті басшысының орынбасары Алмас Искаков.

Еске салсақ, Қызылорда облысында «Ауыл аманаты» жобасы аясында ауқымды жұмыстар атқарылуда.