Қызылорда облысында биыл Руханият жылы атап өтілмек
ҚЫЗЫЛОРДА. KAZINFORM – Сыр өңірінің мәдениет және өнер саласындағы жағымды жаңалықтар биыл да жалғасады. Бұл туралы облыс әкімі Нұрлыбек Нәлібаев облыстық мәслихат сессиясында айтты.
Өткен аптадағы кеңейтілген мәжілісте Мемлекет басшысының «Адал адам» концепциясы аясында барлық елді мекендегі клубтар мен мәдениет үйлерінде «Адал адам» рухани-мәдени орталықтары ашылатыны айтылды. Бұл орталықтарда отаншылдық, нағыз маман болу, еңбекқорлық сияқты асыл қасиеттер дәріптеледі.
«Былтыр Қызылорда қаласында «Анаға тағзым» орталығы, «Отбасы орталығы» өз қызметін бастады. «Шірік-Рабат Сақ жауынгері» мен «Сығанақ ханшайымының» мүсіндері облыстық музейге тапсырылды. Халқымыздың жыл басы және жаңару айы – Наурыздан бастап Сыр өңірінде биылғы жылды «Руханият жылы» деп жариялаймыз», – деді Нұрлыбек Машбекұлы.
Былтыр өнер және әдебиет өкілдеріне «Тұран» арнайы сыйлығы табысталды. Желтоқсан айында елордада Қызылорда облысының мәдениет және өнер күндері жоғары деңгейде өткізілді.
Алдағы сәуір айында өнер күндері Алматы қаласында ұйымдастырылмақ.
Жақында 1000 орындық «Өнер орталығы» қызметін бастайды. Барлық ауданда неке қию залы, кітапхана, музей, архив, жастар, ардагерлер мен аналар үйі орналасатын «Руханият» орталықтары салынады.
