Қызылорда облысының санитариялық-эпидемиологиялық бақылау департаментіне басшы тағайындалды
ҚЫЗЫЛОРДА. KAZINFORM - ҚР Денсаулық сақтау министрлігінің бұйрығымен бұл қызметке Сыздықова Гүлмира Жамбылқызы келді.
Гүлмира Жамбылқызы 1969 жылы Қызылорда қаласында дүниеге келген. 1987 жылы Қызылорда мемлекеттік медициналық училищесінде «Емдеу ісі, фельдшер» мамандығы бойынша білім алса, 1995 жылы Қарағанды мемлекеттік институтын «Медико-профилактикалық іс» мамандығы бойынша бітірген.
Алғашқы еңбек жолын 1987 жылы Қызылорда темір жол СЭС-інде паразитология бөлімінің дезинструкторы болып бастап, әрі қарай лаборант-химик, коммуналдық гигиена бойынша санитар дәрігердің көмекшісі қызметтерін атқарды.
1995-1998 жылдар аралығында Арал аудандық СЭС-інде дезинфекционист-дәрігер қызметінде болды.
1999-2017 жылдар аралығында Қызылорда қалалық СЭС-те өндіріс гигиенасы, балалар және жасөспірімдер гигиенасы, жалпы санитариялық қағадағалау, тағам нысандарын қадағалау бағыттары бойынша бас маманнан бөлім басшысына дейін сатылап көтерілді.
2017-2023 жылдар аралығында Қызылорда қалалық СЭББ басшысының орынбасары, 2023 жылдан басшысы қызметін атқарды.
Еске салсақ, бұдан бұрын аталған қызметте болған Динара Олжабайқызы Жаңабергенова БҚО санитариялық-эпдемиологиялық бақылау департаментінің басшысы лауазымына тағайындалды.
