Қызылордада өрт шарпыған аумақ көлемі бірнеше есе артты
ҚЫЗЫЛОРДА. KAZINFORM — Күн ысығалы бері Қызылорда облысының мемлекеттік орман қоры аумағында 26 өрт оқиғасы тіркелді.
Облыстық төтенше жағдайлар департаментінің мәліметінше, жалпы аумағы 1295 гектардан астам жерді қызыл жалын шарпыды. Бұл өткен жылдың сәйкес кезеңімен салыстырғанда бірнеше есе жоғары.
— Өрттің басым бөлігі Жалағаш, Шиелі, Арал және Сырдария аудандарында тіркелген. Біраз өрт ошағы геопортал жүйесі мен рейдтік іс-шаралар барысында анықталса, кейбір жағдайлар қалдық немесе шөп өртеу кезінде талапты сақтамағаннан болған. Ашық отты пайдалану кезіндегі салғырттық та тілсіз жауға жол ашып берген. Кінәлілер жауапкершілікке тартылып, тиісті іс-шаралар қабылданды, — деді департаменттің мемлекеттік өрт бақылау басқармасының бастығы Бейбітхан Спанов.
Өңірде қауіпсіздік талаптарының сақталуына бақылау күшейді. Жыл басынан бері орман шаруашылығы, полиция және жергілікті атқарушы орган өкілдерінің қатысуымен 50-ден астам рейд ұйымдастырылды. 125 профилактикалық іс-шара өтті. Оған 1400-ден астам тұрғын қатысты.
Облыстық төтенше жағдайлар департаменті бұған дейін өрттің басым бөлігі тұрғын үй секторларында тіркелгенін мәлімдеген болатын.
