Қызылордада іссапар шығынын өз шотына аударған бас есепшілер тергеліп жатыр

ҚЫЗЫЛОРДА. KAZINFORM — Қызылордада жұмысшылардың жалақысы мен іссапар шығынын өз есепшотына аударған бас есепшілерді тергеп-тексеру басталды.

Облыстық прокуратура мәліметінше, Қызылорда қаласындағы «Дарын» облыстық қосымша білім беру орталығының бас есепшісі іссапар мен жалақыға көзделген 50 млн теңгені, Ақай ауылындағы № 99 мектептің бас есепшісі 42 млн теңге бюджет қаражатын өзінің жеке есепшотына заңсыз аударған.

Бұл фактілер бойынша Қылмыстық кодекстің 189-бабы 4-бөлігінің 2-тармағымен сотқа дейінгі тергеп-тексеру басталды.

— Сондай-ақ Жаңақорған ауданындағы 81 жеке балабақшаға 723 млн теңге дотация төленбей, соның салдарынан 1847 қызметкер жалақысын ала алмаған. Прокуратураның ықпалымен барлық кәсіпкерлік субъектісіне төлемдер аударылып, жалақылары берілді. Бұдан бөлек, орта білім беру ұйымдарында 171 мың оқушының сабақ кестесі санитарлық-эпидемиологиялық талаптарға сәйкес келмей, аралық үзілістер қысқартылғаны анықталды, — деді облыс прокуроры Ризабек Ожаров.

Бұған дейін Қызылордадағы жергілікті компания 1,2 млрд теңге қосымша құн салығын төлемегенін жазғанбыз.