Қызылордада жыл басынан бері 23 адамды кене шаққан

ҚЫЗЫЛОРДА. KAZINFORM – Жыл басынан бері Қызылордада 23 адам кене шағу жағдайларымен медициналық көмекке жүгінген. 

Оның басым бөлігі, дәлірек айтқанда, 16 адам облыс орталығынан болса, Шиеліден 4, Жаңақорған, Сырдария және Жалағаш аудандарының әрқайсысынан 1 адамнан тіркелген.

– Кене көбіне малға күтім жасау, мал қораны тазалау, табиғат аясында демалу кезінде, үй жануарларына жақындағаннан шағады. Былтыр өңірде Конго-Қырым геморрагиялық қызбасы бойынша эпидемиологиялық ахуал қолайсыз болды. Ауруға күдікті 18 жағдай есепке алынып, оның 9-ы клиникалық, эпидемиологиялық және зертханалық жолмен расталды, - деді облыстық санитариялық-эпидемиологиялық бақылау департаментінің басшысы Гүлмира Сыздықова. 

2024 жылы облыс бойынша 115 елді мекен қолайсыз деп танылса, биыл олардың саны 111-ге азайды. Биыл 9 сәуірде кенеге қарсы залалсыздандыру жұмысы басталады. 

Былтыр Түркістан облысында кене шаққан 1 416 адам медициналық ұйымдарға қаралған.