Қызылордалық диқандар 470 мың тоннаға жуық күріш жинады
ҚЫЗЫЛОРДА. KAZINFORM – Қызылорда облысында егін ору және жинау науқаны аяқталды. Бұл туралы облыстық ауыл шаруашылығы және жер қатынастары басқармасының баспасөз қызметі мәлімдеді.
Биыл Қызылорда облысында 189,6 мың гектар жерге ауыл шаруашылығы дақылдары, оның ішінде 80,9 мың гектар жерге күріш егілді. Егін жинау науқанына 4 мыңнан астам техника тартылды. Ал агропарк қатары 139 жаңа техникамен толықты.
— Нәтижесінде қызмет сапасы жетіліп, өнімділік артты. Сырбойылық диқандар күзгі жиын-терімге уақытылы кірісіп, толағай табысқа қол жеткізді. Күзгі жиын-терім кезінде 470 мың тоннаға жуық өнімді қамбаға құйып, күріштің әр гектарынан 58,1 центнерден өнім алды, — делінген хабарламада.
Сондай-ақ күріштен басқа 13 мың тонна дәнді дақыл жиналды. Оның 5,6 мың тоннасы — майлы дақылдар, картоп, көкөніс, 380 мың тоннасы — бақша дақылдары, 358 мың тоннасы — мал азығы түріндегі дақылдар.
Айта кетейік, жуырда Ы.Жақаев атындағы Қазақ күріш шаруашылығы ғылыми-зерттеу институтын жетілдіруге республикалық бюджеттен 4,1 млрд теңге бөлінетіні белгілі болды.
