Қызметтен кетемін деген қорқыныш болған жоқ – Айдарбек Сапаров Үкіметтегі ауыс-түйіс туралы

АСТАНА. KAZINFORM – Ауыл шаруашылығы министрі Айдарбек Сапаров қайта жасақталған Үкімет құрамында қалай жұмыс істейтіні туралы пікір білдірді.

«Бүгін кеңейтілген отырыстан кейін, Президент нақты тапсырмалар бергеннен кейін Ауыл шаруашылығы министрлігінде жаңа тәсілдер қолға алынатын шығар. Мен тек өз министрлігіме ғана жауап беремін», - деді министр Үкіметтің кеңейтілген отырысы алдында БАҚ өкілдерінің сұрағына орай.

«Жаңа Премьер-Министр талапшыл деп жатыр. Ол талаптарға сай келуге дайынсыз ба?» - деп сұрады журналист.

«Әрине, Премьерді әрқашан тыңдау керек, біз Үкімет мүшесіміз ғой. Бірге жұмыс істейміз, бірге жылжимыз», - деді Айдарбек Сапаров.

«Орынтағыңыздан айырылып қалам деп қорықтыңыз ба?» - деген сұраққа министр: «Ешқандай қорқыныш болған жоқ. Әрдайым сенімді жұмыс істеу керек. Біз – әскерміз, қайда жұмсаса, сонда барамыз», - деді ведомство басшысы.