Кодекстің жаңа талаптары бойынша дәрі-дәрмектер мен өзге де медициналық өнімдерді сертификаттауды тек мемлекет қана жүзеге асырады
АСТАНА. Қыркүйектің 22-сі. ҚазАқпарат /Айдар Оспаналиев/ - Қазақстан Республикасының «Халықтың денсаулығы және денсаулық сақтау жүйесі туралы» кодексінің жаңа талаптары бойынша енді дәрі-дәрмектер мен медициналық бағыттағы өнімдер мен құралдарға сертификат берумен тек мемлекеттік органдар айналысатын болады.
Бұл туралы бүгін аталмыш мәселеге байланысты журналистермен баспасөз мәслихатын өткізген Денсаулық сақтау министрлігінің Фармацевтикалық бақылау комитетінің төрағасы Баймұқан Сыздықов мәлім етті, деп хабарлайды ҚазАқпарат.
Оның айтуынша, «Халықтың денсаулығы және денсаулық сақтау жүйесі туралы» кодексіне аталмыш талаптар тұтынушыларды сапасыз немесе жалған өнімдерден сақтандыру мақсатында енгізіліп отыр. Бұған қоса кодексте дәрі-дәрмектердің қауіпсіздігі, тиімділігі мен сапасы ұлттық қауіпсіздікке қатер төндіретін мәселелердің қатарына енгізілген. «Халықаралық тәжірибе бойынша дәрі-дәрмектерді сертификаттау мемлекеттің құзырында болуы қажет.
Ал Қазақстан ТМД аумағында күні бүгінге дейін дәрі-дәрмектерді сертификаттауды жекелеген компаниялар жүзеге асыратын жалғыз ғана ел болып отыр», деді комитет төрағасы.
Оның сөзіне қарағанда, бүгінде елімізде Денсаулық сақтау министрлігінің «Дәрі-дәрмектерді сараптау ұлттық орталығы» республикалық мемлекеттік кәсіпорны мен оның 12 құрылымдық бөлімшелері жұмыс істейді. Аталмыш орталықтың сынақ зертханасы барлық отандық және халықаралық стандарттарға сай және онда барлық қажетті құрал-жабдықтар бар.
«Қазіргі таңда аталмыш орталықты еуропалық ресми зертханалардың қатарына енгізу және тіркеу жөнінде тиісті жұмыстар жүргізілуде. Еуропалық зертхана Еуропа құрлығындағы және өзге көптеген дамыған мемлекеттердің құзырлы органдары тіркелген ауқымды ұйым. Оның құрамына кірген жағдайда Қазақстанда берілетін сертификат талаптары халықаралық базадағы мәліметтермен сәйкестендіріліп, соның нәтижесінде сапасыз өнім тез арада анықталып, оны жедел түрде айналымнан шығаруға мүмкіндік туады», деді Б.Сыздықов.
