Қоғамның қарсылығына қарамастан көкпар тартқан батыр қыз жайлы деректі фильм жарық көрді

АСТАНА. ҚазАқпарат - Қазақстанда көкпаршы қыз Ева Жигалина жайлы «Ева. Батыр қыз» атты деректі фильм түсірілді. Бұл - бала кезінен дала төсінде ойқастап, көкпар мәдениетін бойына сіңіріп өскен табанды қыздың сүйікті ісімен айналысу жолындағы күресі жайлы оқиға, деп хабарлайды ҚазАқпарат.

Дәстүрлі қасаң қоғамда әйелдерге көкпар тартуға қатаң тыйым салынған.

Бірақ Ева қиындыққа мойымастан табандылық танытып, таптаурындарды бұзды, әлеуметтік және мәдени тосқауылдарды еңсере білді.

Ол «көкпар - тек ерлердің ойыны» деген мықтылармен текетіресте болды.

Дегенмен Еваны қолдайтындар да табылып, оның жігеріне, арманына адал мінезіне лайықты бағасын бере алды.

Олар Еваны жігерлендіріп, тосқауылдарға төтеп беруіне көмегін аямады. Ева кәдімгі қара күштен де, икемнен де кенде емес, ал оның ішкі жігері, жалыны мен табандылығы көрген адамды қанаттандырады.

Фильм көрерменді эмоциялық саяхатқа үйіріп әкетіп, кейіпкердің алдындағы қиындықтарды, оның сәйгүлікке деген махаббатын паш етеді.

«Ата-анам көкпарға қатысуға тыйым салған. Бірақ бір жерде көкпар болып жатыр десе делебем қозып, үйден қашып кететінмін. Көкпарға алғаш рет 15 жасымда қатыстым. Шақырусыз барған едім. Өзім де таң қалдым. Атта отырып, ерлердің көкпарда жан алып, жан берісіп жатқанын көрдім. Оларға қосыла кетіп, серкені тартып алыппын. Ерлер мені қуа жөнелді, бірақ ұстатпай кеттім. Қазір жұрттың көкпарға қызығуы артқанын көріп жүрмін. Маған ұлдар да, қыздар да хат жазып, үйретші деп жатады», - дейді Ева Жигалина.

«Ева. Батыр қыз» деректі драмасы - Темірбек Аманжолдың режиссерлік алғашқы қадамы.

Темірбектің өзі де ат туризмін және атқа отыру мәдениетін зерттеп жүр. Еваның хикаясы - салт-дәстүр, жігер мен құрбандық шиеленіскен әлемге шытырман саяхат.

Осындай қым-қуыт әлемде нәзік жан ағысқа қарсы жүзіп, махаббат пен жалынның алмайтын қамалы жоғын айшықтайды дейді ол.

«12 жылдан бері аттарды фильмге түсіріп, атқа отыру мәдениетін, неономадизмді зерттеп жүрмін. «Ева. Батыр қыз» фильмінде қазақылықтың формуласын паш еткім келді. Елі бөтен, діні бөтен басқа жұрттар неліктен осы ойынға ғашық болып, бар өмірін сарп етуге дайын? Көкпар мен ат несімен тартады? Еңбекті осы сұрақтарға жауап іздейтін зерттеу десеңіз де болады», - дейді Темірбек Аманжол.

Фильмнің продюсері Думан Қожахметтің айтуынша, осы фильмнің халықаралық деңгейге шығуға әлеуеті мол.

Қазір бірнеше шетелдік стриминг-сервистермен прокат туралы келіссөз жүріп жатыр дейді ол.

Деректі фильм ҚР Мәдениет және спорт министрлігінің тапсырысымен Ұлттық киноны қолдау мемлекеттік орталығының қолдауымен түсірілді.