Көкшетау мектебіндегі жарылғыш затқа байланысты 600-ге жуық адам эвакуацияланды

КӨКШЕТАУ. KAZINFORM – Көкшетауда қалалық №4 орта мектебінің ғимаратына жарлығыш зат қойылғандығы туралы хабарға байланысты 600-ге жуық адам эвакуацияланды.

Ақмола облысы ПД баспасөз қызметінің мәліметінше, шақыру орнына полиция қызметкерлері және өзге де құқық қорғау органдары мен күштік құрылымдар, сондай-ақ Көкшетау қаласының шұғыл қызметтері бағытталды. 

«Азаматтардың қауіпсіздігін қамтамасыз ету үшін оқушылар, мұғалімдер және мектеп әкімшілігі мен техникалық персоналдардан тұратын барлығы 600-ге жуық адам эвакуацияланды. Ғимаратты саперлер, жарылғыш заттар жұмыс істейтін техниктер және қызметтік иттері бар кинологтар тексеріп шықты, жарылғыш зат табылмады. Қазіргі уақытта жалған хабар берген адам іздестіріліп жатыр», - деді ведомстводан.

Осы ретте, тәртіп сақшылары терроризм актісі туралы көрінеу жалған хабарлау Қылмыстық кодекстің 273-бабы бойынша қылмыстық жауаптылыққа әкеп соғатынын және осы бап бойынша қылмыстық жауапкершілік 14 жастан басталатынын еске салады.

Айта кетсек, бұдан бұрын Ақмола облысында астық сақтайтын қойма өртенгенін жазған едік.