Көкшетауда төрт жасар бала 2-қабаттан құлап кетті
КӨКШЕТАУ. ҚазАқпарат - Көкшетауда ағасымен бірге қалған төрт жасар бала екінші қабаттағы пәтердің терезесінен құлап кетті, деп хабарлайды ҚазАқпарат тілшісі Ақмола облыстық ПД баспасөз қызметіне сілтеме жасап.
Ведомствоның мәліметінше, 20 мамырда екінші қабаттың терезесінен баланың құлап кеткені туралы хабарлама түсті.
«Төрт жасар бала 10 жасар ағасымен үйде жалғыз қалған. Осы кезде ата-анасы емханаға кеткен. Үлкен ағасы жуыну бөлмесінде болған кезде, бала өздігінен терезеге көтеріліп, байқаусызда терезеден құлап кетті. Құлаған баланың жағдайы тұрақты, дене сынықтары мен жарақаттары жоқ», - деп атап өтті ведомстводан.
Еске сала кетсек, биылғы жылғы 14 мамырда Көкшетауда жетінші қабаттың терезесінен екі жасқа таяған бала құлап кеткен болатын. Ол жедел жәрдем бригадасы келгенше көз жұмды.
