15:14, 10 Мамыр 2012 | GMT +5
Көлік ұрлаумен айналысқан ағайындылар қолға түсті - ІІМ
АСТАНА. 10 мамыр. ҚазАқпарат - Алматы қаласының ІІД қызметкерлері жедел іс-шаралар барысында шетелдік көліктерді ұрлаумен айналысып жүрген Алматы облысының тұрғындары - 22 және 23 жастағы ағайындыларды ұстады.

Бұл туралы бүгін ҚР Ішкі істер министрлігінде өткен брифинг барысында мәлім болды.
Министрліктің баспасөз хатшысы Нұрділдә Ораздың айтуынша, жүргізілген жедел іс-шаралар барысында ағайынды екі жігіттің қала тұрғындарының шетелдік көліктерін ұрлап жүргендігі дәлелденді.
«Өткен жылдың қарашасы мен биылғы жылдың мамыр айы аралығында күдіктілер ауладағы көліктерді кілтпен ашып, оларды бөлшектеп сату үшін шетелдік 3 көлікті («Мазда-626» 2 автокөлігі және Фольксваген Гольф-2») қолды қылғаны анықталды. Тексеру барысында ұсталғандардан екі көлік тәркіленіп, иелеріне қайтарылды. Бір көлік бөлшектенген күйде анықталды. Қылмыскерлердің өзге ашылмаған қылмыстарға қатыстылығы тексерілуде», - дейді Н. Ораз.