Көлік министрлігі демалыс базаларындағы ұшу аппараттарын түгел тексермекші

АСТАНА. KAZINFORM – Көлік министрі Марат Қарабаев Алакөлдегі дельтаплан апаты туралы пікір білдірді.

Үкімет отырысынан кейін өткен баспасөз мәслихатында Көлік министріне Алакөлдегі дельтаплан апаты туралы сұрақ қойылды.

«Сөзсіз, тексеру жүргіземіз. Біріншіден, мұндай типтегі дельтапландарды да, АН-2 ұшағын да. АН-2 ұшақтары туралы айтсақ, 263 данасы бар. Соның тек 94-і ғана ұшуға жарамды, қалғандары жарамсыз. Сөз жоқ, заң бұзылатын жайттар бар. Ұшуға жарамсыз болса да, ұшқыштың тиісті сертификаты болмаса да қызмет көрсетіліп жатады. Сіз айтып отырған дельтапланда да сондай жағдай», - деді ол.

Ведомство басшысы мұндай фактілердің бәріне қосымша тексеру жүргізілетінін айтады.

«Кез келген ұшатын аппаратқа бір жылдық немесе 3 жылға дейін ұшуға жарамды екені туралы сертификат беріледі. Сіз айтып отырған дельтаплан типі сертификат алмаған. Осыған байланысты әуе кемелері мен дельтаплан типтес ұшу аппараттарына, соның ішінде АН-2 ұшақтарына да кешенді тексеру жүргізу туралы шешім қабылданды», - деді Марат Қарабаев.