Көмір тапшылығынан Түркістан облысында жылыжайдағы өнімдер үсіп жатыр

None
ТҮРКІСТАН. ҚазАқпарат - Түркістан облысында көмірдің жоқтығынан жылыжайларды жылыту мүмкін болмай, ондағы көшеттер мен өнімдер үсіп жатыр, деп хабарлайды ҚазАқпарат тілшісі.

Түркістан облысында жылыжай иелері пісіп үлгермеген өнімін қоқысқа тастауға мәжбүр. Себебі, шаруалар күн суығанда көмірдің жоқтығынан жылыжайларын жылыта алмаған. Бұл туралы кәсіп иелері әлеуметтік желіде тараған видеоларда да айтып, қынжылыс білдіруде.

Мәселен, Сайрам ауданындағы «НұрАгро» шаруа қожалығында 150 тонна қызанақ берер егін жарамсыз болып қалған. Иесі Нұржан Садуақасов құзырлы органдардан арнайы комиссияның келуін күтіп отыр. Сонан соң, бүлінген егінді жинап, малға бермек.

Бұл жағдайға қатысты түсінік берген Түркістан облысы әкімдігінің баспасөз қызметі жылыжай иелеріне қолдау көрсетілетінін жеткізді.

«Биыл қаңтар айында ауа райы -22 градусқа дейін күрт суып, қар қалың түсті. Жеке жылыжай шаруашылықтары тиісті көмір қорын қалыптастырмағандықтан қыс мезгіліне дайын болмай шықты. Облыс әкімінің тапсырмасына сәйкес шұғыл іс-шаралар атқарылып, 591,0 гектар (1058 агроқұрылым) жылыжайларға қыста 200,8 мың тонна көмір отыны қажеттігі анықталды. «Қазақстан темір жолы» АҚ арқылы 186,7 мың тонна көмір облысқа жеткізілді» - делінген ақпаратта.

Әкімдік мәліметіне сүйенсек, жылыжайлардың 94% қолдан жасалған жеңіл конструкциялы болғандықтан, өнімдері үсіп кеткен. Оның ішінде 167 тауар өндірушінің 36 гектар жылыжайы қар салмағын көтере алмай жарамсыз күйге түскен. Осылайша, жеке кәсіпкерлер шығынға ұшырады.

«Әкімдік тарапынан тауар өндірушілердің мүлкіне келтірілген нұқсан жөнінде акті ұсынылған жағдайда қаржы ұйымдары алдындағы берешегін (несие) өтеу мерзімін 1 жылға кейінге шегеру жөнінде ұсыныс жолданады. Сондай-ақ зардап шеккен жылыжай иелерін қаржы ұйымдары арқылы жеңілдетілген несиемен қамтамасыз ету жұмыстары атқарылады» - делінген Түркістан облысы әкімдігінің баспасөз қызметі таратқан мәліметте.

Айта кетейік, бұдан бұрын Түркістан облысында көмірге сұраныс күрт артқанын жазған болатынбыз. Басты себеп – облыста жылыжайлардың көбеюі. Сондықтан, кәсіпкерлік бағыттағы нысандарды көмірмен қамтамасыз ету мәселесі күн тәртібінде тұр. Сонымен қатар күннің күрт суытуы да көмірге сұранысты жоғарылатқан.


Соңғы жаңалықтар
telegram