«Комиссар Жүргенов» романы алты тілге аударылады
АЛМАТЫ. ҚазАқпарат – Алматыда Темірбек Жүргеновтің 125 жылдығына арналған салтанатты іс-шара өтті. Ол Бейбіт Қойшыбаевтың «Комиссар Жүргенов» атты жаңа кітабының тұсаукесерінен басталды. Бұл туралы Мәдениет және спорт министрі Асхат Оралов әлеуметтік желідегі парақшасында жазды, деп хабарлайды ҚазАқпарат.
«Алматыдағы Абай атындағы Мемлекеттік академиялық опера және балет театрында өткен Темірбек Жүргеновтің 125 жылдығына арналған салтанатты іс-шараға қатыстым. Оған шығармашылық зиялы қауымның көрнекті өкілдері, сондай-ақ ТҮРКСОЙ халықаралық түркі мәдениеті ұйымының қонақтары келді. Атап айтқанда, Бас хатшының орынбасары Билал Чакыжы қатысты.
Іс-шара жазушы Бейбіт Қойшыбаевтың «Комиссар Жүргенов» атты жаңа кітабының тұсаукесерінен басталды. Айтпақшы, көрнекті мемлекет қайраткеріне арналған бұл роман алты тілге аударылып, басқа түркі елдерінде де басылып шығады», - деп жазды министр.
Сондай-ақ, Темірбек Жүргенов атындағы Қазақ ұлттық өнер академиясының студенттерінің қатысуымен концерт өтіп, тарихи тұлғаның өмірі мен қызметі туралы баяндайтын театралды, музыкалық және би қойылымдары көрсетілген. Жиынның ашылу салтанатында министр Президент Қасым-Жомарт Тоқаевтың құттықтау хатын оқып берді.
Абай атындағы театр ғимаратында мерейтой иесіне арналған картиналар мен мүсіндер көрмесі де өтті.
«Әрине, бұл біз атап өткен маңызды күнге орайластырылған жалғыз іс-шара емес. Мемлекет басшысының тапсырмасы бойынша жыл бойы еліміздің барлық аймағында 100-ден астам түрлі іс-шара өтеді. Темірбек Жүргеновтің мерейтойы – басқа түркітілдес елдерде де аталып өтетін халықаралық ауқымдағы оқиға», - дейді министр.
Еске салсақ, 2023 жыл түркі әлемінде Темірбек Жүргенов жылы болып жарияланған.
