Конференция лигасы: «Қайрат» Алматыда «Панатинаикосқа» есе жіберді
АСТАНА. KAZINFORM — Бүгін футболдан UEFA Конференция лигасы негізгі кезеңі екінші турындағы «Қайрат» (Алматы, Қазақстан) — «Панатинаикос» (Грекия) кездесуі өтті.
Жанкүйерлер бұл кездесуді асыға күтті. Қазақстандық команда алғашқы турда сырт алаңда Латвияның «Рига» клубымен 1:1 есебіне қанағат білдірген еді. Сол сәттілік сериясын жалғастырып, алматылық команда жеңіске жетуге күш салатынынан үміттенді. Дегенмен грекиялық клуб сапында тәжірибелі футболшылар жинақталған. Сондықтан «Қайрат» үшін бұл кездесудің оңайға соқпайтыны белгілі болды.
Кездесу барысында грекиялық клуб алғашқы болып есеп ашты. Алдымен олардың қатарынан 6-минутта Висенте Таборда есеп ашса, 24-минутта Сирил Дессерс пенальтиден мүлт кеткен жоқ.
Екінші кезеңде грекиялық команда тағы үш гол соқты. Ойын барысында Сирил Дессерс 47-минутта тағы бір мәрте көзге түссе, Кингз Кангва 57, Эльмин Растодер 75-минутта мергендік танытты.
Ал алматылық клуб сапынан Исмаил Бекболат 79-минутта бір голмен жауап қайырды.
Осылайша, «Қайрат» қарсыласына 1:5 есебімен есе жіберді.
Енді қазақстандық команда сырт алаңда Италияның «Аталанта» клубымен кездессе, 26 қарашада өз алаңында Швецияның «Мьельбю» командасымен ойнайды.
Одан кейін өз алаңында 10 желтоқсанда Румынияның «Университатя Крайовосын» қабылдаса, 17 желтоқсанда Нидерландта «Твентемен» кездеседі.UEFA Конференция лигасының алғашқы турында «Қайрат» сырт алаңда Латвияның «Рига» командасымен 1:1 есебімен тең түссе, «Панатинаикос» өз алаңында Босния және Герцоговинаның «Борац» клубын 2:1 есебімен қапы қалдырды.
