Конго Эбола індетінің таралуын болжау үшін мобильді байланыс деректерін пайдалана бастады

Талдауды шведтің коммерциялық емес Flowminder ұйымы жүргізеді. Мамандар ұялы телефондардың базалық станцияларға қосылуы туралы жинақталған деректер негізінде халықтың қозғалысын зерттейді.

Деректерді елдегі ірі ұялы байланыс операторы Vodacom тегін ұсынады. Ақпаратта абоненттердің жеке басын анықтауға мүмкіндік беретін мәліметтер жоқ.

Маусым айында жарияланған алғашқы талдау Итури провинциясындағы Бунья, Мунгвалу және Рвампара аудандарын қамтыды. Індет осы аумақтарда басталған болуы мүмкін деген болжам бар. Зерттеушілер аталған аудандардан тұрғындардың қай бағыттарға көбірек қатынағанын бақылаған.

Маусым айының соңына қарай адам ағыны ең жоғары болған он бағыттың барлығында Эбола жағдайлары тіркелді.

– Мамандар Конго өзенінің бойындағы ірі көлік торабы Кисанганиге ерекше назар аударды. Мобильді байланыс деректерінің талдауы алғашқы жағдайлар анықталмай тұрып-ақ бұл қалаға вирустың таралу қаупі жоғары екенін көрсетті. Осыдан кейін Кисанганиде эпидемияға қарсы шаралар күшейтілді, – делінген хабарламада.

Зерттеу Кисанганидің Киншаса және Конго өзені бойындағы басқа елді мекендермен тығыз байланысын да көрсетті. Кисанганимен байланысы ең жоғары 50 аумақтың 15-і Киншаса провинциясында орналасқан.

Маусым айының соңында Дүниежүзілік денсаулық сақтау ұйымы қыркүйек айының соңына дейін ел астанасында Эбола жағдайының анықталу ықтималдығын 70% деп бағалады.

Конго Демократиялық Республикасы үкіметінің мәліметінше, 15 мамырда індет жарияланғаннан бері Эболаны 6250-ден астам адам жұқтырып, 3039-дан астам адам қайтыс болды.

ДДСҰ қазіргі індетті тарихтағы ең жылдам таралып жатқан Эбола өршуі деп бағалап отыр.

Бұған дейін Конгода Эболаға қарсы вакцинация басталғаны хабарланған. ДДСҰ да Конго Демократиялық Республикасындағы жағдайға байланысты індеттің одан әрі таралу қаупі бар екенін ескерткен еді.

Айта кетейік, ДДҰ Конгодағы Эбола індетінің көрші елдерге таралу қаупі туралы ескертті.