Қорғаныс министрі жүргізушісі талып қалған автобусты тоқтатқан баланы «Ел қорғаны» медалімен марапаттады

әскер
Фото: ҚР Қорғаныс министрлігінің баспасөз қызметі

Бұл награданы «Жас сарбаз» балалар-жасөспірімдер қозғалысының тәрбиеленушісі Ақжол Геройға қорғаныс ведомствосының басшысы атынан Десанттық-шабуылдау әскерлерінің қолбасшысы генерал-майор Алмаз Жұмакеев табыс етті, деп хабарлайды Kazinform қорғаныс ведомствосының баспасөз қызметіне сілтеме жасап.

Іс-шараға Десанттық-шабуылдау әскерлерінің қолбасшылығы мен жеке құрамы, Ақжолдың ата-анасы және «Жас сарбаз» қозғалысының тәрбиеленушілері қатысты.

Генерал-полковник Руслан Жақсылықов «Жас сарбаз» әскери-патриоттық клубының тәрбиеленушісі Ақжолға батыл іс-әрекетінің арқасында жол-көлік оқиғасының алдын алғаны үшін ізгі тілектерін жеткізген.

әскер
Фото: ҚР Қорғаныс министрлігінің баспасөз қызметі

«Сіздердің ұлдарыңыз сындарлы сәтте нағыз батыр екенін дәлелдеді», - делінген Ақжолдың ата-анасына жазылған алғыс хатта.

22 қарашада Іле ауданы Өтеген батыр кентіндегі №24 лицейдің 8 сынып оқушысы Ақжол Герой 219  қоғамдық автобусқа отырған болатын. Жолай жүргізушінің жүрек талмасы ұстайды. Мұны байқаған Ақжол жүргізуші кабинасына жүгіріп жетіп, тежегішті басып үлгереді. Соның арқасында автобус тұрғын үй қоршауына жарты метр ғана жер жетпей тоқтайды.

8 сынып оқушысының жедел қимылы қауіптің алдын алды.

әскер
Фото: ҚР Қорғаныс министрлігінің баспасөз қызметі

Куәгерлердің айтуынша, Ақжол көлікті тоқтатпағанда ол үйді соғатын еді. Оқушының бұл батыл әрекеті туралы хабарламалар барлық ақпараттық арналар мен әлеуметтік желілерде кеңінен жариялануда.

Өзі оқитын мектепте ержүрек оқушы ноутбукпен марапатталды. Алматы облысының әкімі Марат Сұлтанғазиев оған алғыс хат пен соңғы үлгідегі iPhone 15 ұялы телефонын табыс етті.

әскер
Фото: ҚР Қорғаныс министрлігінің баспасөз қызметі

 

Соңғы жаңалықтар