Көркем жүзу: Бейжіңде қоржынымыз тағы бір медальмен толықты
АСТАНА. KAZINFORM – Қытай астанасы Бейжіңде өтіп жатқан көркем жүзуден әлем кубогының алғашқы кезеңінде Қазақстан қоржынына үшінші жүлде түсті.
Спортты дамыту дирекциясының баспасөз қызметі мәлім еткендей, жекелей сында ерлер арасындағы еркін бағдарламада Виктор Друзин қола жүлдегер атанды. Ол финалда 161.5771 балл жинады. Бұл 17 жастағы қазақстандықтың әлем кубогындағы алғашқы жүлдесі екенін айта кетейік.
Еске салсақ, Виктор осыған дейін 2021 жылы Ресейдегі әлемдік серия бәсекесінде микст дуэт бағдарламасында да 3-орын иеленген болатын.
Аталған сында жастар арасында әлем чемпионы Филиппо Пелати (Италия) 174.5979 ұпаймен топ жарса, Жорди Касерес Иглесиас (Испания) 163.5543 ұпаймен күміске қол созды.
Айта кетейік, бұл кезеңде 14 елден келген 85 спортшы сынға түсіп жатыр.
Кеше Эдуард Ким мен Наргиза Болатова жұбы (микст дуэт) техникалық бағдарламада күміс жүлдегер, ал топтық сайыста Қазақстан құрамасы техникалық бағдарламаның қола жүлдесіне қол жеткізгенін жазған болатынбыз.
