Коронавирус: Алматыда бірінші эшелонда дайындалған төсек-орынның 80 пайызы толды

АЛМАТЫ. ҚазАқпарат - Бірінші эшелон бойынша жасақталған төсек-орынның 80 пайызы толған, ол 5 стационарда орналасқан. Бұл туралы онлайн брифинг барысында Алматы қаласы қоғамдық денсаулық басқармасының өкілі, жоғары медицина колледжінің директоры Светлана Сұлтанғазиева айтты, деп хабарлайды ҚазАқпарат тілшісі.

30 наурыз күні Алматыда коронавирус инфекциясының 526 жаңа жағдайы тіркелген, оның 425-і - симптомдық белгілері бар және 101-і - симптомсыз.

Бір тәулік ішінде – 306 науқас қабылданса, стационардан 209 науқас шығарылған.

Светлана Сұлтанғазиеваның айтуынша, Алматыда қазір 5 мыңнан астам инфекциялық төсек-орын ұйымдастырылған. Оның барлығы 3 эшелонға бөлінген.

«Қазіргі уақытта инфекциялық ауруханаларда коронавируспен 2 793 адам жатыр. Оның ішінде 109-ы бала, аса ауыр жағдайдағы науқастар – 46. Бірінші эшелон бойынша жасақталған төсек-орынның 80 пайызы толған, ол 5 стационарда орналасқан. Екінші эшелон бойынша 2400 төсек-орын 15 медициналық ұйымда жасақталды, қазір оның 43 пайызы толған. Үшінші эшелон бойынша 8 медициналық ұйымда төсек-орын ұйымдастырылды және оның 14 пайызы толды», - дейді ол.

Жалпы реанимация және интенсивті терапия бөлімшесінде – 125 науқас бар, ондағы бос төсек-орын саны – 295.

Оған қоса «Халық Арена» спорт кешенінде 1000 орын жасақталған , қазір онда 18 науқас жатыр.