Коронавирус анықталған Іле тұрғынымен байланыста болған 47 адам оқшауланды
ТАЛДЫҚОРҒАН. ҚазАқпарат - Бүгін Алматы облысының Іле ауданында коронавирус жұқтырған тағы бір адам анықталды. Ол 47 адаммен қарым-қатынаста болған, деп хабарлайды ҚазАқпарат тілшісі.
Алматы облысы әкімінің баспасөз қызметінің мәліметінше, олардың 34-нің анализі теріс нәтиже көрсетті. Эпидемиологиялық тексеру жалғасып жатыр.
Ал 1988 жылғы науқастан індет профилактикалық тексеру кезінде анықталған. Қазір онымен қарым-қатынас жасаған 47 адамның барлығы оқшауланды.
Науқас қазір Қарасай аудандық орталық ауруханасының инфекциялық бөліміне жатқызылды.
Айта кетейік, осы сағатта Алматы облысында коронавируспен ауырғандар саны 114-ке жетті. 10 адам індеттен жазылып шықты.
