Коронавирус: БҚО-да инфекциялық стационарлар 53,8% толған
ОРАЛ. ҚазАқпарат – Батыс Қазақстан облысында 751 төсектік 14 инфекциялық стационарда коронавирус жұқтырған 404 науқас емделуде, деп хабарлайды ҚазАқпарат тілшісі.
БҚО Денсаулық сақтау басқармасынан мәлім еткеніндей, қазіргі кезде ауруханалар 53,8 пайызға толған.
Соның ішінде Орал қаласында 578 төсектік 8 стационарда 379 адам (65,5 пайыз) ем алуда.
Жансақтау бөлімшесіндегі 22 науқастың 20-сы – ауыр, екеуі аса ауыр халде. Бұлардың екеуі инвазивті жасанды тыныс алу аппаратына, төртеуі инвазивті емес құрылғыға, 16-сы оттегі концентраторына қосылған.
Жыл басынан бері 8 518 адамнан коронавирус анықталса, соның 855-і – оқушылар.
Биыл 15 адам індеттен көз жұмды.
Басқармадан түскен мәліметке қарағанда, 267 995 адам (егілуге жататын тұрғындардың 64,6 пайызы) вакцинаның бірінші, 251 083-і (60,5 пайызы) екінші компонентімен егілді.
Сондай-ақ облыс бойынша 48 076 адам ревакцинациядан өтті. 9 193 адам Pfizer вакцинасын қабылдаса, соның 326-сы – жүкті, 4 110-ы – бала емізетін әйелдер, 4 757-сі – жасөспірімдер.
Еске сала кетейік, бұдан бұрын Батыс Қазақстан облысында 3400-ден астам адам амбулаториялық деңгейде ем алып жатқанын жазған болатынбыз.
