Қостанай қаласының барлық көшесіне асфальт төселеді
ҚОСТАНАЙ. ҚазАқпарат - Қостанай қаласында 90 шақырымға жуық жолға тас төселеді, деп хабарлайды ҚазАқпарат қалалық ТКШ бөлімінің басшысы Алексей Тарасовқа сілтеме жасап.
«Қазіргі уақытта жолдардың сапасына қатысты тұрғындардан шағым көптеп келуде. Көшенің ойлы-шұңқырлы болуынан көліктер балшыққа батып, әбігерге түседі.Тұрғындар осы проблеманы бірнеше рет көтерді. Енді алдағы 5 жылда қаланың барлық көшесіне асфальт төсейтін боламыз», - деді А.Тарасов.
Қазір қала көшелерінің 90 шақырым жолына тас төселмеген. Бұл аумақты тасжолмен қамтамасыз етуге жыл сайын 700 млн-1 млрд теңге бөлінеді. 5 жылға есептегенде бұл сома 4,5 млрд теңгені құрайды.
«Мамандармен кеңесе келе, жол жөндеу жұмыстарына «суық ресайклинг» әдісін қолданамыз. Ол біздің климаттық белдеуімізге дәлме-дәл келеді. Дымқылды жақсы көтереді», - деді ТКШ бөлімінің басшысы.
Бұған дейін хабарлағанымыздай , биыл Қостанай облысында жергілікті маңызы бар 394 шақырым тасжол жөнделеді. Бұл туралы бүгін «Нұр Отан» партиясы облыстық филиалы Саяси кеңесінің кеңейтілген отырысында мәлім болды.
