Қостанай облысында 8 санитарлық бекет қойылды
ҚОСТАНАЙ. ҚазАқпарат – Қостанай облысының 6 ауданында санитарлық бекет жұмыс істей бастады. Бұл туралы Өңірлік коммуникациялар алаңында өткен брифингте Жергілікті полиция қызметі басқармасының бастығы Құрмет Мәжікенов мәлім етті, деп хабарлайды ҚазАқпарат.
Бұған дейін Қостанай облысында 12 санитарлық бекет орнатылғанын хабарлаған едік.
Қазір оның саны 20-ға дейін көбейіп отыр.
«Бүгін сағат 00.00 - ден бастап облыста қосымша 8 бекет қойылды. Олардың 5-еуі Арқалық қаласын және Қарасу, Сарыкөл, Қамысты және Ұзынкөл аудандарында болса, 3-еуі –Рудный қаласында. Бекеттердегі жұмысты қажетті қорғаныс құралдарымен жабдықталған полицейлер мен медицина қызметкерлері жүзеге асырады. Бекеттегі қызметті тәулігіне 12 сағаттан ауысыммен атқарады. Бекеттерді қоюдағы негізгі міндет – коронавирустық инфекцияның таралуына жол бермеу үшін халықпен алдын-алу жұмыстарын жүргізу. Медицина қызметкерлері дене температурасын өлшей отырып, жүргізушілер мен жолаушыларды визуалды профилактикалық тексеруден өткізеді», - дейді Құрмет Мәжікенов.
Полиция қызметкерлері санитарлық бекет арқылы өтетін көлікті тексеріп, есепке алады, сондай-ақ облыстың бас мемлекеттік санитарлық дәрігерінің қаулысында көрсетілген шектеу шараларының сақталуын қадағалайды.
