Қостанайда 60 тұрғынға пәтер кілті табысталды
ҚОСТАНАЙ. ҚазАқпарат - ҚР Тәуелсіздігі күні мерекесі қарсаңында Архимед Мұхамбетов қостанайлықтарға «Северный» шағынауданындағы жаңа пәтерлердің кілтін тапсырды, деп хабарлайды ҚазАқпарат тілшісі.
Бүгін «Нұрлы жер» мемлекеттік бағдарламасымен салынған пәтерлер 60 тұрғынға берілді. Олардың барлығы - «Тұрғын үй құрылыс жинақ банкі» АҚ салымшылары. Жалпы, жыл басынан бері мың шақты тұрғын баспаналы болған.
«Бұдан бөлек шағынауданды абаттандыруға 2 млрд теңге қарастырылып отыр. Естеріңізде болса, былтыр осы аумақтан 2 көпқабатты үй пайдалануға берілген. Алдағы уақытта тағы 4 үй салынып, 2018 жылдың соңына дейін тұрғындарға тапсырылады. Жоспар бойынша, осы «Северный» шағынауданында 11 көпқабатты үй саламыз», - деді аймақ басшысы.
«Қазақстанның Тұрғын үй құрылыс жинақ банкі» АҚ облыстық филиалының директоры Дәурен Саудабаевтың айтуынша, биыл облыста 14 үй салынды. Мұндағы пәтерлердің бағасы 1 шаршы метріне 148 000- 153 000 теңге аралығында. Олардың барлығы «Нұрлы жер» арқылы тұрғызылды.
Қостанай облысында тұрғын үй құрылыс жинақ жүйесі арқылы несиелік үй бағытында 2018 жылы 1000-нан астам пәтер пайдалануға беріледі деп жоспарлануда.
