Қостанайда баласын құдыққа тастаған әйел іздестірілуде
ҚОСТАНАЙ. ҚазАқпарат - Қостанай облыстық ІІД Федоров ауданында құдықтан табылған нәрестеге қатысты мәлімдеме жасады, деп хабарлайды ҚазАқпарат тілшісі.
Қостанайлық полицейлер жаңа туған сәбиін құдыққа тастаған ананы іздестіріп жатыр.
«2 сәуір күні сағат 19:15-те Федоров ауданы Кеңарал ауылының тұрғыны құдықтан шақалақтың денесін көрген. Бұл факт ҚР ҚК 100-бабы («Жаңа туған баланы анасының өлтіруі») бойынша сотқа дейінгі тергеп-тексерудің бірыңғай тізіліміне енді. Сараптамалар тағайындалды», - деді облыстық ІІД баспасөз хатшысы Ирина Беженерь.
Еске салсақ, бүгін аталған фактіні ҚазАқпарат тілшісіне ҚР ҰҚК 2031 шекара бөлімі командирінің орынбасары Рахмедин Уәжитов растаған болатын.
