Қостанайда психиатр-дәрігердің тұтқындалуы адам өліміне қатысты болуы мүмкін
ҚОСТАНАЙ. ҚазАқпарат - 2 наурыз күні полиция қызметкерлері Қостанай облыстық жүйке аурулары диспансерінің бөлім меңгерушісі Зәуреш Изалдинаны жұмыс орнында тұтқындады, деп хабарлайды «ҚазАқпарат» ХАА тілшісі.
Оны клиника қызметкерлерінің көзінше тұтқындаған. Оқиға куәгерлерінің айтуынша, Изалдинаны ауруханадан қолына кісен салып алып шыққан.
«ҚазАқпарат» тілшісі Қостанай облыстық ІІД-нің баспасөз қызметіне Изалдинаны тұтқындау себебі жайлы, сондай-ақ оның Қостанай облыстық сот-медициналық сараптамасының төрайымы Рашида Сандыбаеваны өлтіру қылмысына қатысы бар-жоғы туралы сауал жолдады.
Баспасөз қызметінің маманы бұл ақпаратты растап, не жоққа шығарудан бас тартты. Тек сауалға қажетті процессуалдық іс-әрекеттер өткізілгеннен кейін жауап берілетіндігін мәлімдеді.
Еске сала кетейік, 20 ақпан күні танымал дәрігер, облыстық психиатриялық диспансерінің бұрынғы басшысы Рашида Сандыбаеваның қатыгездікпен өлтірілген денесі табылды.
1 наурыз күні қылмысқа қатысы бар күдіктілер тұтқындалған еді.
