Қостанайда жерді заңсыз иеленіп алғандар анықталды
ҚОСТАНАЙ. KAZINFORM – Жоғары аудиторлық палата Қостанайда жер учаскелерін өз бетінше иеленіп алудың 174 жағдайын анықтады. Әкімдік тиісті шаралар қабылдап жатыр.
Қостанай қаласының әкімдігі жер учаскелерін негізсіз иеленіп алудың 174 фактісі бойынша тиісті шаралар қабылдады. Бұл фактілер биыл Жоғары аудиторлық палата жүргізген аудит барысында анықталды.
— Қостанай облысында мемлекеттік ресурстардың пайдаланылу тиімділігіне жүргізілген аудит аясында Жоғары аудиторлық палата Қостанайда жерді өз бетінше иеленіп алу белгілері бар әрі құқық белгілейтін құжаттары жоқ ғимараттар салынған жер учаскелеріне қатысты 174 жағдайды анықтады. Мұндай объектілер жер және салық есебінен тыс қалып, бюджетке түсім әкелмейді әрі қала үшін құқықтық белгісіздік туындатады, — делінген ЖАП хабарламасында.
Осыған байланысты Қостанай қаласының әкімдігіне анықталған жағдай бойынша іс-шаралар жоспарын әзірлеу тапсырылды.
— Бүгінде тиісті жоспар іске асырылып жатыр. Ол әрбір жағдайды атаулы түрде тексеруді, жер учаскелерін ресімдеуді, әкімшілік жаза қолдануды, сотқа дейінгі талап қою жұмыстары мен өзге де шараларды көздейді. Атап айтқанда, жерді заңсыз иеленіп алған тұлғаларды анықтау үшін 143 факт бойынша мәліметтер полиция департаментіне жолданды.
31 факт бойынша материалдар Жер ресурстарын басқару департаментіне жіберілді. Расталған бұзушылықтар бойынша әкімшілік хаттамалар жасалып, оларды жою туралы нұсқамалар берілді, — делінген хабарламада.
Егер салынған объектілердің құқық белгілейтін құжаттары болса, иелері жер пайдалану құқығын ресімдеп, бюджетке жер учаскесін пайдаланғаны үшін жалдау ақысын немесе жер учаскесінің сатып алу құнын төлей алады. Мұндай құжаттар болмаса, заң бұзған адамдар айыппұл төлеп, заңсыз салынған объектілерді бұзуға міндетті.
Айта кетелік Ақмолада 121 мың гектар жер мемлекет меншігіне қайтарылған еді.
