Қостанайдың бас полицейі халықпен әлеуметтік желі арқылы тілдеседі
ҚОСТАНАЙ. ҚазАқпарат - Қостанай облысы полиция департаментінің бастығы Бекет Аймағамбетов Фейсбуктен парақша ашты, деп хабарлайды ҚазАқпарат тілшісі.
«Қымбатты достар! Мен Фейсбук әлеуметтік желісінен өзімнің жеке парақшамды аштым. Бұл - сіздермен кері байланыс орнатудың бірден-бір жолы деп білемін. Барлық сауалдар мен өтініштерді жеке қарап, шешім қабылдайтын боламын. Дәл осындай тікелей байланыс арқылы полиция жұмысы ашық әрі жандана түсетіні сөзсіз», - деп жазды генерал жеке парақшасында.
Сондай-ақ, Бекет Аймағамбетов өзінің күнделікті жұмысы жайында және маңызды оқиғаларға қатысты жеке пікірін білдіріп отыратынын жеткізді. Ол жұртшылықты ашық әңгіме алаңына шақырды.
