Қостанайлық оқушы құлаған үй қабырғасының астында қалып қойды
ҚОСТАНАЙ. ҚазАқпарат - Қарабалық ауданында бұзылып жатқан үйдің бір қабырғасы құлап, астында бала қалып қойды, деп хабарлайды ҚазАқпарат.
Ақпаратты аудандық білім бөлімінің жетекшісі Дилнара Сапанова растады. Оқиға 8 шілде күні Шадысаев ауылында болған.
«Балалар бұзылған үйдің маңында ойнап жүрген. Өздерінің велосипедтерін үй қабырғасына тіреп қойған. Үйлеріне қайтпақ болған балалар терезе жақтауында демалып отырады. Сол сәтте қабырға құлап кеткен», - деді Дилнара Сапанова.
Құлаған қабырғаның астында Талғат Бекбаев есімді оқушы қалып қойған. Бір айта кетерлігі, бұзылған үй жәбірленуші оқушының ата-анасына тиесілі болған.
Қазіргі уақытта Талғат Бекбаев облыстық ауруханада ем алып жатыр. Жағдайы бірқалыпты.
