Костенко атындағы шахтадағы жағдай әлі де қауіпті - Геннадий Силинский
Кәсіби әскерилендірілген апаттық-құтқару қызметтерінің Республикалық орталық штабы Қарағанды филиалы директорының бірінші орынбасары Геннадий Силинский шахтадағы апат салдарына қатысты түсінік берді, деп хабарлайды Kazinform тілшісі Руслан Ғаббасов оқиға орнынан.
«Қазір үш міндетті шешіп жатырмыз. Біріншіден, шахтадағы апатты учаскедегі өртті сөндіру жалғасып жатыр. Сонымен қатар, зардап шеккендер қауіпсіз жерге көшірілуде. Бұдан бөлек, шахтаның шығыс бөлігінде қалып қойған кеншілерді іздестіріп жатырмыз», - деді Геннадий Силинский.
Оның айтуынша, шахтадағы жағдай әлі де қауіпті. Себебі ол жерде жинақталған газ жарылып, көміртек тотығы таралған.
«Сондықтан тиісті іс-қимылдар жасалып жатыр. Бірақ әлі де қауіп бар. Қазір болжам айту қиын. Шахтаның ішінде құбырдағы ақау салдарынан, газға қатысты ахуал қиындауы мүмкін. Жақын арада апатты учаскеден зардап шеккендерді эвакуациялауды аяқтаймыз. Осыдан кейін бар күш-жігерімізді өртті сөндіруге жұмылдырамыз», - деді филиал директорының бірінші орынбасары.
Оның айтуынша, апат себебін үкіметтік комиссия анықтайды.
Бұдан бұрын хабарланғандай, шахтада қаза тапқан 28 кенші табылды. Қалған 18 адам іздестіріліп жатыр.
