Көтерілісшілер басып алған резиденцияда Каддафи болмай шықты
АСТАНА. 24 тамыз. ҚазАқпарат - Сейсенбі күні Ливия көсемі Муаммар Каддафидің резиденциясына басып кірген көтерілісшілер Баб-әл-Азизия орамынан оның ізін де таба алмады.
Каддафи мен оның ұлдары бұл жерден табандарын жалтыратып үлгеріпті, деп хабарлайды полковник Ахмед Омар Баниге сілтеме жасап АFP агенттігі.
«Баб-әл-Азизия тұтасымен біздің бақылауымызға көшті. Полковник Каддафи мен оның ұлдары мұнда болмай шықты. Олардың қайда екенін ешкім де білмейді», - деп мәлімдеді Бани.
24 тамыз, сәрсенбіге қараған түнде Муаммар Каддафи Триполи радиостансасы эфирінен Ливия халқына арнап сөз сөйлеп, «астананы тастап шығу, тактикалық жүріс екендігін» айтады. Каддафи көтерілісшілер мен НАТО-ның әскеріне қарсы күресін басқа жолмен жалғастыратынына уәде беріпті.
