ҚПЛ: «Ордабасы» «Шахтерді» ірі есеппен жеңіп, біріншілікті сәтті бастады

АСТАНА. KAZINFORM - Бүгін футболдан Премьер-лига командалары арасындағы ел біріншілігінде шымкенттік «Ордабасы» өз алаңында Қарағандының «Шахтерін» ірі есеппен жеңді.

Өткен жылы ел чемпионы атағын тұңғыш мәрте жеңіп алған «Ордабасы» биыл да сол жетістігін жалғастыруды қалайды. Сондықтан құрамына жаңадан футболшылар тартып, чемпиондық атаққа үміткер ұжымдар қатарына қосылып отыр.

Қаржылық қиындыққа байланысты «Шахтердің» бірқатар ойыншылары басқа клубқа ауысып кетті. Биыл олар негізінен жергілікті түлектерге үміт артады.

Кездесу барысында шымкенттік клуб жылдам гол соғып үлгерді. Ойынның 5-минутында Игорь Пластун есеп ашса, одан кейін Шахбоз Умаров 13, Жасурбек Яхшибоев 37-минутта есепті үстемелей түсті.

Шымкенттік клубтан Златан Сехович 60, Сергей Малый 68-минутта тағы екі гол соқты.

Осылайша «Ордабасы» қарсыласын 5:0 есебімен ірі есеппен жеңді.

Бүгін, 2 наурызда «Қайрат» «Қызылжарды» 2:1 есебімен сүріндірсе, «Елімай» мен «Атырау» 0:0 есебіне қанағат білдірді.

Сондай-ақ, 1 наурызда «Астана» «Жеңісті» 2:0 есебімен жеңсе, «Қайсар» «Ақтөбеге» 1:3 есебімен жол берді.

Енді бүгін 19.00-де «Тобыл» (Қостанай) мен «Тұран» (Түркістан) шеберлік байқасады.