ҚР Қарулы Күштерінде әскери қызметшілерді медициналық тексеру жалғасуда
АСТАНА. 16 қазан. ҚазАқпарат - Қазақстан Қарулы Күштерінде тереңдетілген медициналық тексерудің бірінші кезеңі аяқталды. Бұл тексеруден әскери қызметшілердің барлық санаты: аға және кіші буындағы офицерлер, генералдар, келісім-шарт бойынша әскери қызметшілер өтеді.
Бұл туралы ҚР Қорғаныс министрлігінің баспасөз қызметінен хабарлады.
Жыл сайын өткізілетін рәсімнің басты мақсаты - әскери қызметшілердің денсаулығын сақтау. Оның тереңдетілген медициналық тексеру деп аталуы әскери қызметшілердің денсаулық жағдайы кең түрде тексеріліп, талдау жасалып, флюрография және басқа да дәрігер мамандардың қарауынан өтеді. Жасы үлкен топтағылар үшін электрокардиограммадан өту міндетті болып саналады.
«Әскери қызметшілерді медициналық тексеруден өткізу ауруды болдырмауға және оның алдын алуға бағытталады, - деді Қазақстан Қарулы Күштері Бас әскери медицина басқармасының басшысы, медицина қызметінің полковнигі Әзижан Оразалин. - Сонымен бірге біз бұрын анықталған аурудың динамикасын бақылап отырамыз».
Тексерудің нәтижесі бойынша қажет болған жағдайда әскери қызметшілерді санаториялық-курорттық емнен өту үшін санаторияларға жібереді. Қорғаныс министрлігі әскери қызметшілер тегін санаториялық-курорттық ем алу үшін бірнеше отандық санаториялармен шарт жасасқан.
Биылғы тереңдетілген медициналық тексеру тамыз айында басталды. Алда оны жүргізудің әлі үш кезеңі бар. Алдағы желтоқсан айында әскери дәрігерлер медициналық тексерудің қорытындысын шығарып, әскери қызметшілер денсаулығының мынадай үш топтан тұратын жалпы картинасын жасайды: «толық дені сау», «іш жүзінде дені сау», «ауру-сырқауы бар».
Қазірдің өзінде әскери дәрігерлер тексерудің алғашқы кезеңі бойынша аралық қорытынды шығара алады. Тұтастай алғанда әскери қызметшілердің денсаулығы жақсы. Мұқият медициналық тексеру, қызметке түсу үшін неғұрлым мықты, дендері сау үміткерлерді іріктеу, қызмет процесінде тұрақты медициналық бақылау және қажет болған жағдайда профилактикалық ем жасау қажет етеді.
