ҚР Орталық сайлау комиссиясына жеке және заңды тұлғалардың 44 өтініші келіп түсті
ҚР ОСК төрағасы орынбасарының атап өтуінше, 2016 жылғы 20 қаңтардан бастап 22 ақпанға дейінгі кезеңде Ортсайлаукомға жеке және заңды тұлғалардың 44 өтініші келіп түскен.
«Олардың 19-ы Қазақстан Республикасы Парламенті Мәжілісінің депутаттарын сайлау жөніндегі сайлау науқанымен байланысты (4-еуі қоғамдық бірлестіктерден, 11-і жеке тұлғалардан, 3-еуі БАҚ-тан, 1-еуі облыстық сайлау комиссиясынан) болды. Соның ішінде 10 өтініш сайлау заңнамасының жекелеген нормаларын түсіндіру мәселелері бойынша, тағы 9-ы Парламент Мәжілісінің депутаттығына кандидаттарды ұсынуға, партиялық тізімдерге енгізілген кандидаттарға байланысты сайлау рәсімдеріне қатысты», - деді ол.
В.Фоостың атап өтуінше, ОСК-ге келіп түскен 25 өтініш Қазақстан Республикасы мәслихаттарының депутаттарын сайлау жөніндегі сайлау науқанына байланысты. Олардың ішінде 17-сі сайлау заңнамасын түсіндіру мәселелері бойынша, қалғандары рәсімдік сәттерге, сайлау комиссияларының жұмысына, кандидаттар туралы ақпаратқа қатысты болды.
«Өтініш иелеріне уақтылы жауап қайтарылды. Тоғыз өтініш тиісті органдарға қарау үшін жіберілді», - деді ҚР ОСК төрағасының орынбасары.