ҚР ОСК: Дауыс беру құқығын беретін есептен шығару куәліктерін беру және есепке алу қағидаларына өзгерістер енгізілді (ФОТО)
АСТАНА. ҚазАқпарат - Бүгін ҚР Орталық сайлау комиссиясының отырысында дауыс беру құқығын беретін есептен шығару куәліктерін беру және есепке алу қағидаларына өзгерістер енгізілді.
Сәйкесінше қаулы жобасын таныстырған ҚР ОСК хатшысы Бақыт Мелдешов ҚР Орталық сайлау комиссиясының 2009 жылғы 8 ақпандағы №161/306 қаулысымен бекітілген дауыс беру құқығын беретін есептен шығару куәліктерін беру және есепке алу қағидаларына бірқатар өзгерістер енгізілгенін атап өтті.
«Атап айтқанда, қағидалардан 7-тармақ алынып тасталды. Ал 8-тармақ жаңа редакцияда жазылды. Оған сәйкес есептен шығару куәлігі бір елді мекеннің шегіндегі басқа сайлау округінде немесе басқа сайлау учаскесінде дауыс беруге қатысқысы келетін сайлаушыларға берілмейді», - деді Б.Мелдешов.
Осыдан кейін ҚР Орталық сайлау комиссиясы мүшелері сәйкесінше қаулыны бірауыздан қабылдады.
