ҚР Премьер-Министрі ИДБ және Oppenheimer қорының басшылығымен кездесті
АСТАНА. ҚазАқпарат - Бүгін «Астана» халықаралық қаржы орталығының ресми ашылуы аясында ҚР Премьер-Министрі Бақытжан Сағынтаев Oppenheimer қорының басқарушы директоры Джон Тонеллимен және Ислам даму банкінің президенті доктор Бандар Мохаммед Хамза Хаджармен кездесті, деп хабарлайды ҚазАқпарат primeminister.kz сілтеме жасап.
Кездесулер барысында Қазақстандағы инвестициялық жобаларды қаржыландыру тұрғысынан одан әрі ынтымақтастық мәселелері талқыланды, сондай-ақ халықаралық бизнес үшін кеңейтіліп жатқан мүмкіндіктер қаралды.
Ислам даму банкінің президенті доктор Бандар Мохаммед Хамза Хаджармен кездесуде экономиканың басым секторларында, оның ішінде ауыл шаруашылығы, инфрақұрылымдық жобалар, сондай-ақ ғылым мен технологияларды дамыту салаларында өзара іс-қимылды нығайту келешегі қаралды.
1995 жылы Ислам ынтымақтастығы ұйымына қосылғаннан кейін Қазақстан Ислам даму банкінің мүшесі болды. 2012-2015 жылдары Қазақстан аумағында ИДБ өзінің ТМД аумағындағы алғашқы Елдік стратегиясын жүзеге асырды, бұл ел экономикасына, атап айтқанда, сауданы қаржыландыру, жекеменшік секторды дамыту және сақтандыру салаларына шамамен $650 млн тартуға жол ашты. Бүгінгі таңда банк жалпы сомасы $1,874 млрд құрайтын 67 жобаны мақұлдады. ИДБ қолдаудың негізгі бағыттары: көлік инфрақұрылымын дамыту (жалпы операциялар сомасының 55,8%), ауыл шаруашылығын дамыту (23,3%), шағын және орта бизнесті және қаржы секторын дамыту (19%), білім беру (1%), денсаулық сақтау (0,8%), ақпараттық-коммуникациялық технологиялар, санитарлық бақылау және қала қызметтері.
Кездесуге қатысушылар Қазақстанның ИДБ-мен ынтымақтастығының кеңеюіне Астанада АХҚО базасында Халықаралық ислам сауда-қаржы корпорациясы (ITFC) өкілдігінің ашылуы ықпал ететінін атап өтті.
Доктор Бандар Мохаммед Хамза Хаджар ҚР-ның ITFC-ке қосылуы ұлттық экспортты және өзара сауданы жетілдіруге ықпал ететінін, сондай-ақ Қазақстанға ИЫҰ-ға мүше елдер ретіндегі жаңа құралдар мен тұрақты қаржы көздерін, нарықтарды қамтамасыз ететінін мәлімдеді. Бұдан өзге, бұл Қазақстанға ИЫҰ елдерімен өзара сауда-саттықта құнды тәжірибе алуға, сонымен қатар ITFC технологиялары мен жинақталған тәжірибені дайын өнім экспортын дамытуға бағыттауға жол ашады.
Oppenheimer қорының директоры Д. Тонеллидің Бақытжан Сағынтаевпен кездесуі барысында компанияның «Самұрық-Қазына» ҰӘҚ жекешелендіру бағдарламасына қатысуы, инфрақұрылымдық қор құру, сондай-ақ қазақстандық компанияларды шетелдік капитал нарықтарына шығару мәселелері қаралды.
Oppenheimer - инвесторларға, жеке тұлғаларға, кәсіпорындарға және мекемелерге қаржы қызметтері мен кеңестер беретін жетекші инвестициялық банктердің бірі және көпбейінді инвестициялық компания.
Еске сала кетсек, ҚР Президентінің 2018 жылдың қаңтар айында АҚШ-қа ресми сапары аясында Oppenheimer қоры мен «Kazakh Invest» ҰК арасында инфрақұрылымдық жобаларды қаржыландыру және ұзақ мерзімді несиелендіру үшін инфрақұрылымдық қор құру туралы меморандумға қол қойылды.
