ҚР Президенттік мәдениет орталығы Конституция мерекесін атап өтті
АНА. Тамыздың 28-і. ҚазАқпарат /Гүлмира Әлиакпарова/ - Бүгін ҚР Президенттік мәдениет орталығында Қазақстан Республикасы Конституциясының 14 жылдығына арналған «Ата Заң - ел тірегі» атты мерекелік іс-шара өтті,
деп хабарлайды ҚазАқпарат.
Мерекелік шара Орталықтың «Тәуелсіз Қазақстан және оның негізін салушы Н.Назарбаев» залында өтті.
«Оның басты мақсаты, еліміздің ертеңі мен болашағы - жастарға Ата Заңымыздың қадір-қасиетін, мақсаты мен бағыт-бағдарларын насихаттау және патриоттық тәрбиені дамыту, сондай-ақ Конституцияны құрметтеуге дәріптеу болып табылады», - деп атап өтті Орталық директорының мұражай және ғылым жұмыстары жөніндегі орынбасары Бибінұр Санақұлова.
Б.Санақұлованың айтуынша, тамыздың 30-ы - Конституция күні Президенттік Мәдениет орталығының қабырғасында жыл сайын үлкен салтанатпен атап өтіледі. Оған мектеп оқушылары мен жоғары оқу орындарының студенттері барынша тартылады. Бұл жолғы шара Ә.Марғұлан атындағы №40 мектеп оқушыларының күшімен әзірленген бағдарлама аясында өтті. Оқушылар Конституция күніне, жалпы тәуелсіз Қазақстан Республикасына арналған өлең жолдарын, ән-жырларды тарту етті. Өз кезегінде олар қатысушы қонақтардан Ата Заңға қатысты сауалдарына жауаптар алды.
Шара барысында сондай-ақ, Орталықтың негізгі кітап қорынан «30 тамыз - Қазақстан Республикасының Конституциясы күні» атты кітап көрмесі ұйымдастырылып, ҚР Президентінің телерадиокешені түсірген «Конституция мұраттары» атты деректі фильмнен үзінділер көрсетілді.
