ҚР СІМ: Белгісіз біреулер басып алған А-320 ұшағында Қазақстан азаматтарының бар-жоғы анықталуда
АСТАНА. ҚазАқпарат - Қазақстан Республикасының Сыртқы істер министрлігі белгісіз біреулер басып алған Александрия-Каир бағытындағы А-320 жолаушылар ұшағында Қазақстан азаматтарының бар-жоғын анықтауда. Бұл туралы Сыртқы істер министрлігі баспасөз қызметінің жетекшісі Әнуар Жайнақов мәлім етті.
«Қазір бұл оқиғаға қатысты кез келген ақпарат нақтылануда. Қазақстандықтар туралы ақпарат жоқ, қандай да бір жаңалық болса, хабарлаймыз»,-деді Ә.Жайнақов.
Естеріңізге сала кетейік, белгісіз біреулер басып алған А-320 жолаушылар ұшағы Кипрдегі Ларнаки әуежайына қонды. Бұл туралы жергілікті БАҚ-қа сілтемемен Рейтер агенттігі хабарлады.
Ұшақ Александрия-Каир бағытымен ұшқан еді. Әуе кемесінің бортында 81 адам болған.
БАҚ ұшақты айдап әкеткендер мысырлық әйелдер мен балаларға ұшақтан кетуге рұқсат беруге ниетті екенін хабарлап отыр, деп жазады РИА Новости.
