ҚР СІМ Үрімшідегі жағдайды мұқият қадағалап отыр
деп мәлімдеді бүгін Астанадағы апталық брифингте ҚР Сыртқы істер министрлігінің ресми өкілі Ержан Ашықбаев.
Айта кетейік, қыркүйек айының басында қазақстандық БАҚ-тарда Үрімшідегі жағдай қайтадан ушыға бастағаны, белгісіз біреулер қолдарына піскі алып, адамдарға жаппай шабуыл жасағаны жөнінде ақпараттар тараған болатын. «Бізде бар мәліметтер бойынша, зардап шеккендердің ішінде қазақстандық азаматтар жоқ, не болмаса шабуылдың аталмыш түріне, қандай да бір заңнан тыс әрекеттерге қатысты қазақстандық азаматтардан түскен шағымдар біздің дипломаттарда жоқ», деді бүгінгі брифингте ҚР СІМ-нің ресми өкілі.
Е. Ашықбаев, дейтұрғанмен, ҚР Сыртқы істер министрлігі Үрімшідегі жағдайдың дамуын мұқият қадағалап отырғанын атап көрсетті. «Жағдай бақылауда. Егер қандай да бір ушығулар орын алатын болса, онда сөз жоқ біздің азаматтардың құқықтарын қамтамасыз ету үшін барлық шаралар қабылданатын болады», деді ол.