Кірпіш және цемент зауыттарын қаржыландырмаймыз – Серік Жұманғарин

АСТАНА. KAZINFORM – Премьер-министрдің орынбасары Серік Жұманғарин Сенатта өтіп жатқан Үкімет сағатында 12,6 пайыздық инвестициялық кредиттер бизнестің қай саласына берілетінін айтты.

Сенаторлар «Бәйтерек» ұлттық басқару холдингі арқылы ірі бизнеске берілетін 12,6 пайыздық кредиттің мөлшерлемесін саланың табыстылығына қарай саралап қарау мәселесін көтерген болатын.

Серік Жұманғарин бұл мөлшерлеме Ұлттық банктің базалық мөлшерлемесіне негізделіп белгіленгенін айтып, сала бойынша саралап мөлшерлеме тағайындау қазір мүмкін емес екенін айтты.

- Біз бизнеске берілетін кредиттердің басым бағыттарын қатаң түрде таңдап алдық. Мәселен, газ блоктардың өндірісін, кірпіш және цемент зауыттарын қаржыландырмаймыз. Оның мәні жоқ. Елде ол өндірістер жеткілікті деңгейде бар. Бөлінісі жоғары металлургия, сирек жер металлургиясы, мұнай химиясы, көмір-сутек химиясы, азық-түлігін өңдеу саласы, көлік және логистика, ІТ-сала саласы басым бағытта болады. Туризмде де ірі жобалар болуы мүмкін. Оның өзінде инфрақұрылымға қаржы салынады. Өйткені саланы дамытуға инфрақұрылым жетпей жатыр, - деді Серік Жұманғарин.

Бұған дейін Үкімет «Бәйтерек» холдингінің экономикалық жобаларға құятын капитал көлемін 1 трлн теңгеге арттырғанын жазған едік.