ҚТЖ мойнындағы 4,3 трлн теңге қарыздың 52%-ы шетел валютасымен алынған
АСТАНА. KAZINFORM — «Қазақстан темір жолы» ұлттық компаниясының қаржы жөніндегі басқарушы директоры Дайыр Көшеров кәсіпорынның қарыз құрылымы туралы мәлімет берді.
— Борыш жүктемеміз норматив деңгейінде. Қарыздың EBITDA-ға қатынасы жыл аяғында 3,7 болды. Әлемдегі біз сияқты инфрақұрылым мен жолаушылар тасымалын қатар алып отырған халықаралық теміржол компанияларымен салыстырсақ, бұл коэффицент 4-8 пайыз арасында құбылады. Сонда біз норматив деңгейіндеміз. Бұл — бір. Екіншіден қарыз жүктемеміз қалыпты екенін халықаралық рейтингтер де растап тұр. Соңғы рет еуробондты бағасы бойынша «Бәйтеректің» деңгейінде шығардық, — деді ол «Самұрық-Қазына» қорының қоғамдық кеңес отырысында.
Айтуынша, қарыздың жартысынан көбі шетел валютасында. Соның әсерінен девальвация кезінде ұлттық компанияның қарыз жүктемесі күрт артып кетеді.
— Қазір біздегі қарыздың құны 4,3 трлн теңге. Оның 48 пайызы теңгемен, 52 пайызы шетел валютасымен алынған, — деді басқарушы директор.
Бұған дейін Сенаттағы Үкімет сағатында компания төрағасының орынбасары Ерлан Қойшыбаев ҚТЖ-ның номиналды қарызы 4,7 трлн теңге болғанын айтқан.
Айта кетейік, елімізде теміржолшыларға алғашқы жарнасыз 4 пайыздық ипотека беріледі.
