Құдайберген Ержан Шардара ауданындағы құрылыс жұмыстарымен танысты

ШАРДАРА. ҚазАқпарат – Түркістан облысына қарасты Шардара ауданына ҚР Парламенті Мәжілісінің депутаты Құдайберген Ержан келіп, атқарылып жатқан жұмыстармен танысты. Халық қалаулысы облыстық маңызы бар және қала ішінде жөндеуден өткен жолдарды көрді, деп хабарлайды ҚазАқпарат тілшісі.

Депутат алдымен құрылысы аяқталуға жақын 4 қабатты, 40 пәтерлі тұрғын үйлерді аралап шықты.

Сондай-ақ, аудандық орталық аурухана жанынан қосымша салынып жатқан 2 қабатты емхананың құрылыс жұмыстарымен танысты. Аудан орталығындағы орталық стадиондағы күрделі жөндеу жұмыстарын көріп, сонымен қатар орталық ауруханадағы мамандармен кездесті.

Ондағы науқастарға қажетті құрал-жабдықтар мен аппараттар жайлы және басқа да дәрілік, материалдық кем-кетіктер жайлы сұрады. Алдағы уақытта емдеу мекемесінегі науқастарға барынша жағдай жасалу керектігін атап өтті.

Мәжіліс депутаты сапары барысында аудандағы өзге де ауылдарды аралап, халықтың тыныс-тіршілігімен танысты. Жергілікті тұрғындарға шалғай аудандағы әлеуметтік нысандарды іске қосуға мүмкіндігінше қолдау көрсететіндігін жеткізді.